Kinumpirma ng mga awtoridad sa Norway ang kauna-unahang kaso ng avian influenza o bird flu sa isang polar bear sa Europa matapos matukoy ang H5N5 strain sa Svalbard region sa Arctic.
Ayon sa Norwegian Veterinary Institute, natagpuan noong Mayo ang bangkay ng isang lalaking polar bear na tinatayang nasa isang taong gulang, kasama ang isang walrus, sa nagyeyelong kapuluan na humigit-kumulang 1,000 kilometro mula sa North Pole.
Sa isinagawang laboratory testing, lumabas na positibo sa H5N5 variant ng avian influenza ang mga sample mula sa dalawang hayop.
Ayon kay Ragnhild Tonnessen, bird flu coordinator ng institute, nakababahala ang patuloy na pagtaas ng kaso ng virus sa mga mammal sa Europa.
“The results are part of a trend in which highly pathogenic avian influenza viruses are increasingly being detected in mammals in Europe,” ani Tonnessen.
Dagdag pa niya, lumalawak na rin ang sakop ng virus hanggang sa Arctic, na maaaring magdulot ng panganib sa mga sensitibong ecosystem at wildlife population.
Ayon sa governor ng Svalbard, ang natuklasan sa brain samples ng polar bear at walrus ay malakas na indikasyon na bird flu ang posibleng sanhi ng kanilang pagkamatay.
Hindi ito ang unang kaso ng avian influenza sa rehiyon. Noong 2023, isang walrus sa Svalbard at isang polar bear sa Alaska ang naiulat ding namatay dahil sa naturang virus.
Batay sa datos ng World Organisation for Animal Health (WOAH), tinatayang nasa 140 milyong hayop sa halos 70 bansa ang naapektuhan ng avian influenza mula Enero 2025 hanggang Marso 2026, kabilang ang mga namatay at isinailalim sa culling.
Bagama’t mas mababa ito kumpara sa peak outbreak noong 2021–2022, sinabi ng mga eksperto na mas lumalawak ngayon ang pagkalat nito sa mga mammal species, na nagpapataas ng pangamba sa posibleng mas malawak na epekto sa wildlife at, sa ilang kaso tulad ng potensyal na panganib sa tao.
