Inaasahang maayos na tanghali bukas, November 30 ang technical issues sa ilang models ng Airbus aircraft na nagresulta sa kanselasyon at pagkaantala ng ilang mga domestic flight sa Pilipinas, ayon sa Air Carriers Association of the Philippines (ACAP) ngayong Sabado.
Ito ay matapos mag-isyu ang Airbus ng technical advisory para sa ilang Airbus models nito na A320/A31 para sumailalim sa software update.
Iniulat ni ACAP executive director Jose Enriquez Perez de Tagle, 50 porsyento mula sa mga apektadong aircraft ang natapos nang mag-update ng kanilang software. Isang aircraft naman aniya ang kailangan ng dalawang oras para matapos ang pag-upgrade o pag-update ng software nito.
Una ng sinabi ni Transportation Secretary Giovanni Lopez, nasa 75 aircraft ang naapektuhan sa software update, na nagresulta sa pagkansela ng 78 domestic flights at pagkaantala ng iba pang flights.
Ayon naman sa ACAP executive director, 24 oras mula ngayon, unti-unti nang maibabalik ang nakanselang operasyon ng airlines.
Samantala, sa oras naman na makumpleto na ang software update, kailangan ng mga airline na magsumite ng compliance report kaugnay sa airworthiness ng eroplano para mabigyan ng clearance na muling makalipad.
