Idineklara ng Philippine National Police (PNP) na “generally peaceful” ang ikalimang State of the Nation Address (SONA) ni Pangulong Ferdinand Marcos Jr. matapos ang mahigpit na pagpapatupad ng mga hakbang sa seguridad sa loob at labas ng Batasang Pambansa Complex sa Quezon City.
Ayon sa ulat, tiniyak ng PNP ang kaligtasan hindi lamang ng mga opisyal at panauhin sa loob ng plenaryo ng House of Representatives kundi pati na rin ng mga indibidwal at grupong nagtipon-tipon sa labas upang magpahayag ng kanilang saloobin.
Tatlong multi-sektoral na grupo ang nabigyan ng permit ng lokal na pamahalaan ng Quezon City upang magsagawa ng rally sa kahabaan ng Commonwealth Avenue: Bagong Alyansang Makabayan (BAYAN), Sanlakas, at Better Brighter.
Bukod sa tatlong ito, may iba pang grupo ang nagsumite ng aplikasyon para sa rally ngunit nanatiling pending ang kanilang mga permit bago ang araw ng SONA.
Mahigit 20,000 pulis ang idineploy ng PNP upang masiguro ang kaayusan, kabilang ang traffic management at crowd control.
Nakipag-ugnayan din ang PNP sa Metropolitan Manila Development Authority (MMDA) at iba pang ahensya para sa daloy ng trapiko.
Samantala, nagsagawa rin ng mga protesta sa labas ng Metro Manila, kabilang ang Cebu kung saan nagtipon ang BAYAN Central Visayas at iba pang progresibong grupo upang ipahayag ang kanilang pagtutol sa administrasyon.
