Binigyang-diin ni Senate Committee on Finance Chairman Sen. JV Ejercito ang kahalagahan ng pagkakaisa sa pagtatanggol sa pambansang interes, soberanya at karapatan ng mga Pilipino, sa gitna ng mga hamong kinakaharap ng bansa sa usapin ng pambansang seguridad.
Sa kanyang pahayag ngayong araw kaugnay ng panukalang budget ng Department of National Defense para sa 2027, iginiit ni Ejercito na hindi dapat manaig ang pagkakaiba sa pulitika, pansariling interes at iba pang konsiderasyon sa tungkulin ng pamahalaan na protektahan ang bansa.
Ayon sa senador, dapat maging malinaw at matatag ang paninindigan ng pamahalaan sa tuwing nalalagay sa alanganin ang pambansang interes at nalalabag ang mga karapatan ng mga Pilipino.
Binigyang-diin din ni Ejercito ang kahalagahan ng pagpapalakas sa kakayahan ng Armed Forces of the Philippines (AFP), kabilang ang patuloy na pagsuporta sa modernization program nito, upang matiyak ang isang kapani-paniwalang kakayahan sa pagtatanggol ng bansa.
Aniya, bilang chairperson ng Senate Committee on Finance, nais niyang tiyakin ang patuloy na suporta sa modernisasyon ng AFP, alinsunod sa kakayahan ng pamahalaan na pondohan ang mga kinakailangang proyekto.
Giit ng senador, ang pagtatanggol sa dangal at soberanya ng bansa ay dapat manaig sa anumang partidistang interes at manatiling nakabatay sa iisang layunin na pangalagaan ang pambansang seguridad at kapakanan ng sambayanang Pilipino.
