Inatasan ng Kataas-taasang Hukuman ang ilang opisyal ng gobyerno na sagutin ang petisyon inihain kamakailan upang maibalik ng bansa si former President Rodrigo Roa Duterte.
Sa naganap na sesyon ng Supreme Court En Banc, nag-isyu ito ng notisya para utusan ang mga respondents magbigay kasagutan ukol sa ‘writ of habeas corpus
para sa dating pangulo.
Direktiba ng Korte Suprema na magsumite ng kanilang ‘memorandum’ sa petisyon ang ilang matataas na opisyal ng gobyerno sa loob ng 30 araw.
Saad ng korte na dapat ring ikunsidera kung ang naturang kontrobersiya ay maituturing na bilang ‘moot’ at matukoy ang papel nito lalo na sa nagpapatuloy na pagdinig ng kaso sa ICC o International Criminal Court.
Kabilang sa mga pinasasagot ng Kataas-taasang Hukuman ay sina former Executive Secretary Lucas Bersamin, DILG Secretary Jonvic Remulla, Ombudsman Jesus Remulla, ex-PNP chief Francisco Marbil, former PNP-CIDG Director Nicolas Torre III, ex-Solicitor General Menardo Guevarra, ex-Foreign Affairs Secretary Enrique Manalo, at iba pa.
Magugunitang naghain ng petisyon noong Marso sina Kitty Duterte, Davao City Mayor Baste Duterte, at Davao City Rep. Pulong Duterte sa Korte Suprema para maiuwi ang dating Pangulong Duterte pabalik ng bansa.
