Isinusulong ng Department of Agriculture (DA) ang isang plano upang ibalik ang ilan sa mga pangunahing kapangyarihang regulasyon ng National Food Authority (NFA).
Ito ay sa pamamagitan ng pag-amyenda sa kasalukuyang Rice Tariffication Law (RTL) na layong palakasin ang kakayahan ng NFA na gampanan ang kanyang mandato sa pagtiyak ng seguridad sa pagkain ng bansa pagdating sa bigas.
Gayunpaman, mahalagang linawin na ang panukalang pag-amyenda ay hindi kasama ang pagbibigay ng kapangyarihan sa NFA na direktang mag-import ng bigas.
Ayon kay Agriculture Secretary Francisco Tiu Laurel Jr., ang importasyon ng bigas ay mananatili pa rin sa kamay ng pribadong sektor. Ito ay upang mapanatili ang kompetisyon sa merkado at maiwasan ang potensyal na pagkontrol ng pamahalaan sa presyo ng bigas.
Dagdag pa niya, bagamat ang pribadong sektor ang mamamahala sa importasyon, sila ay kinakailangang gampanan ang kanilang responsibilidad sa pagpapanatili ng sapat na reserba ng bigas sa bansa.
Ito ay isang mahalagang bahagi ng panukalang upang masiguro na may sapat na suplay ng bigas sa lahat ng panahon, lalo na sa panahon ng kalamidad o kakulangan.
Sa ilalim ng panukalang set-up na isinusulong ng DA, ang mga rice imports ay dapat na sumunod sa isang controlled model. Ito ay katulad ng ipinatutupad na sugar import program ng Sugar Regulatory Administration (SRA).
Sa ganitong sistema, tanging mga kwalipikadong importer lamang ang bibigyan ng kaukulang import allocations. Ang mga pamantayan sa pagiging kwalipikadong importer ay itatakda ng DA at NFA upang matiyak na ang mga importer ay may sapat na kapasidad at kredibilidad upang gampanan ang kanilang responsibilidad.
