Nakapagtala ang Pilipinas ng 16 pang kaso ng highly transmissible omicron subvariants na BA.5 at BA.2.12.1.
Ayon kay Health Undersecretary Maria Rosario Vergeire, ang bilang ng mga bagong impeksyon ay nagpataas sa kabuuang kaso ng BA.5 at BA.2.12.1 sa buong bansa sa 11 at 39.
Anim pang kaso ng BA.5 ang natagpuan, kung saan dalawa ay mula sa Metro Manila, at tig-isa mula sa Cagayan Valley, Western Visayas, at Northern Mindanao, habang inaalam pa ang lokasyon ng natitirang pasyente.
Apat na pasyente naman ang ganap na nabakunahan habang tinitingnan pa ng DOH ang status ng iba.
Limang indibidwal ang na-tag bilang naka-recover habang ang isa ay nananatili sa home isolation.
Samantala, 10 pang kaso ng BA.2.12.1, isang sublineage ng nangingibabaw na variant ng Omicron BA.2, ang natukoy.
Apat na pasyente ay mula sa Metro Manila, dalawa mula sa Calabarzon, tig-isa mula sa Cagayan Valley, Bicol region, at Western Visayas, at isa ay isang returning overseas Filipino.
Tatlong indibidwal ang ganap na nabakunahan at ang inoculation status ng mga natitirang pasyente ay biniberipika pa.
Dalawa naman ang may banayad na sintomas, tatlo ay asymptomatic, at ang mga sintomas ng limang pasyente ay patuloy na tinitingnan, ayon pa kay Vergeire.
Walong pasyente ang naka-recover, isang kaso ang nananatiling aktibo, habang ang isa ay patuloy na biniberipika, aniya.
Ang pagkakalantad at kasaysayan ng paglalakbay ng lahat ng mga pasyente ay sinusuri pa rin.
Magugunitang, ang BA.5 ay nagdulot ng pagtaas ng mga kaso ng COVID-19 sa South Africa, habang ang BA.2.12.1 ay binubuo ng karamihan ng mga impeksyon sa New York City.
