Dalawang panibagong diplomatic protest ang inihain ng Department of Foreign Affairs (DFA) laban sa China matapos na mataan ang 160 Chinese vessels sa karagtang sakop ng Pilipinas.
Sa isang diplomatic note na may petsang Abril 21, sinabi ng DFA na ang presensya ng mga barkong ito sa West Philippine Sea ay hayagang pagtapak sa soberenya, sovereign rights at jurisdiction ng Pilipinas.
Ayon sa DFA, namataan ang mga Chinese vessels na ito sa “territorial sea of high tide features” sa Kalayaan Island Group, sa loob ng Exclusive Economic Zone ng Pilipinas, pati na rin sa palibot ng Bajo de Masinloc.
Lima pang Chinese Coast Guard vessels ang nakita ring nasa bisinidad ng Pag-asa island, Bajo de Masinloc at Ayungin Shoal.
“Through these protests, the DFA reminded China that Bajo de Masinloc, Pag-asa Islands, Panata, Parola, Kota Islands, Chigua and Burgos Reefs are integral parts of the Philippines over which it has sovereignty and jurisdiction. The Philippines exercises sovereign rights and jurisdiction over Julian Felipe Reef and Ayungin Shoal,” saad ng DFA.
Ang panibagong diplomatic protests ay karagdagan lamang sa araw-araw na protestang inihahain ng DFA laban sa nananatiling presensya ng mga Chinese vessels sa Julian Felipe Reef.
