Mas pinaigting at pinalawak pa ng Department of Agriculture (DA) ang paghahatid ng tulong at suporta sa mga masisipag na magsasaka at mangingisda sa probinsya ng Zambales, na naglalayong mapabuti ang kanilang kabuhayan at mapalakas ang sektor ng agrikultura at pangisdaan sa rehiyon.
Kabilang sa mga inisyatibong ito ang pagtatayo ng isang modernong modular cold storage facility na nagkakahalaga ng ₱35 milyon.
Ang pasilidad na ito ay partikular na dinisenyo upang pangalagaan ang mga high-value crops, na titiyak na mananatili ang kanilang kalidad at mapapahaba ang kanilang shelf life, at inaasahang makukumpleto sa unang bahagi ng taong 2026.
Pinangunahan mismo ni Agriculture Secretary Francisco Tiu Laurel Jr. ang pamamahagi ng iba’t ibang uri ng tulong, kabilang ang dekalidad na hybrid seeds na makakatulong sa pagpapataas ng ani, mga makabagong makinarya na magpapagaan sa mga gawain sa bukid, at mga shallow tube wells na magbibigay ng sapat na patubig upang mapalakas ang irigasyon sa buong lalawigan.
Layunin ng mga ito na matugunan ang pangangailangan para sa mas episyenteng produksyon at mapalaki ang kita ng mga magsasaka.
Kasabay rin ng mga pamamahagi, inilunsad din ang Mobile Soil Laboratory, isang makabagong kagamitan na direktang pupunta sa mga bukid upang suriin ang kondisyon ng lupa.
Sa pamamagitan ng laboratoryong ito, matutukoy ng mga magsasaka ang eksaktong pangangailangan ng kanilang lupa at angkop na uri ng pataba na gagamitin.
