Naglabas ng freeze order ang Court of Appeals laban sa mga ari-arian ng isang “prominent” o kilalang mambabatas na iniuugnay sa umano’y anomalya sa flood control projects, ayon sa Anti-Money Laundering Council (AMLC).
Sa pahayag ng AMLC, nakakita umano ang korte ng probable cause upang iugnay ang mga asset ng naturang mambabatas, kasama ang isang business associate at isang corporate entity, sa mga kasong plunder, bribery, at graft. Hindi naman pinangalanan ng ahensya ang mga sangkot.
Saklaw ng freeze order ang 25 bank accounts at 10 insurance policies na nakapangalan sa mambabatas. Kasama rin dito ang 27 bank accounts, 10 insurance policies, at isang investment account ng umano’y kasosyo sa negosyo, pati na ang dalawang bank accounts, pitong property accounts, at isang real estate property na nakarehistro sa corporate entity.
Umani ng matinding galit mula sa publiko ang isyu ng anomalya sa flood control projects matapos pumalya ang ilang flood mitigation structures kasagsagan ng nakaraang typhoon season. Nagdulot ito ng malawakang protesta at nakaapekto sa takbo ng ekonomiya ng bansa.
Samantala, sinabi ng AMLC na nakapaghain na ito ng 12 petisyon para sa civil forfeiture laban sa mga ari-ariang pinaniniwalaang konektado sa naturang anomalya. (Report by Bombo Jai)
