Patuloy na bumibilis ang galaw ng Tropical Depression Basyang habang nananatili ang lakas nito sa silangang bahagi ng Mindanao.
Ayon sa pinakahuling ulat, ang sentro ng bagyo ay tinatayang nasa 895 kilometro silangan ng Northeastern Mindanao.
Taglay nito ang maximum sustained winds na 55 km/h malapit sa sentro at pagbugso hanggang 70 km/h.
Kumikilos ang bagyo sa direksyong west southwestward sa bilis na 20 km/h.
Ang malalakas na hangin mula sa bagyo ay umaabot hanggang 210 kilometro mula sa sentro.
Dahil dito, itinaas ang Tropical Cyclone Wind Signal (TCWS) No. 1 sa ilang bahagi ng Mindanao, partikular sa katimugang Surigao del Sur na kinabibilangan ng mga bayan ng Cagwait, Marihatag, San Agustin, Barobo, Tagbina, Hinatuan, Bislig City, Lingig, at Lianga.
Pinapayuhan ang mga residente sa mga nabanggit na lugar na mag-ingat sa posibleng epekto ng malalakas na hangin at pag-ulan, lalo na sa mga mababang lugar na madaling bahain.
