Hinimok ni Baguio City Mayor Benjamin Magalong ang Commission on Audit (COA) na magsagawa ng special audit sa ilang pondo ng pambansang pamahalaan matapos maglabas ng desisyon ang Korte Suprema hinggil sa mga probisyon ng national budgets para sa 2024, 2025, at 2026.
Kabilang sa mga pondong nais niyang masuri ang P449.5 bilyong unprogrammed appropriations sa 2024 budget at P17.99 bilyong karagdagang pondo para sa Special Road Fund sa 2025 budget. Iminungkahi rin niyang suriin ang mga pondong inilabas sa ilalim ng mga probisyong idineklarang labag sa Konstitusyon sa 2026 budget.
Bukod dito, nanawagan si Magalong sa Office of the Ombudsman na magsagawa ng imbestigasyon upang matukoy kung may mga opisyal na dapat managot alinsunod sa batas.
Ayon kay Magalong, mahalagang matiyak na ang bawat pisong mula sa kaban ng bayan ay nagagamit nang wasto at para sa kapakanan ng publiko. Binigyang-diin din niya na ang anumang imbestigasyon ay dapat nakabatay sa ebidensiya at gumalang sa karapatan sa due process.
