Nagsagawa ng magkasanib na anti-submarine warfare (ASW) exercise ang mga hukbong-dagat ng Pilipinas, Peru, Singapore, at Estados Unidos noong Hulyo 15 bilang bahagi ng Rim of the Pacific (RIMPAC) 2026, ayon sa Philippine Navy.
Lumahok sa pagsasanay ang BRP Miguel Malvar ng Philippine Navy, RSS Steadfast ng Singapore, USS Paul Hamilton at USS Carl M. Levin ng U.S. Navy, kasama ang MH-60R Seahawk helicopter at P-8A Poseidon maritime patrol aircraft.
Sa simulation, ginampanan ng BAP Chipana ng Peruvian Navy ang papel ng isang “enemy” diesel-electric submarine na matagumpay na natukoy at na-neutralize ng mga kalahok na puwersa.
Ayon sa Philippine Navy, layunin ng pagsasanay na paigtingin ang koordinasyon at kakayahan ng mga kalahok sa anti-submarine operations, kabilang ang command and control, pagbuo ng common operating picture, evasive maneuvers, at magkakasabay na pag-atake laban sa isang submarine threat.
Binigyang-diin din ng Philippine Navy na ang patuloy na pakikilahok nito sa mga multinational exercises ay nagpapatibay sa papel ng Pilipinas sa pagpapanatili ng kapayapaan at seguridad sa rehiyon.
