Nadakip ng pulisya ang siyam na enforcer ng Land Transportation Office (LTO)-Caraga Region sa isinagawang entrapment operation sa Brgy. Alubijid, Buenavista, Agusan del Norte nitong Huwebes.
Ayon sa mga awtoridad, nahuli ang mga enforcer dahil sa umano’y pangongotong sa mga motorista at biyahero sa gitna ng kanilang operasyon sa kalsada.
Isinagawa ang operasyon matapos makatanggap ng reklamo mula sa mga apektadong motorista hinggil sa umano’y modus ng mga tauhan ng LTO.
Batay sa LTO Central Office, matagal nang may mga reklamong natatanggap laban sa ilang personnel kaugnay ng panghihingi ng pera sa mga motorista tuwing inspeksyon at pagdakip sa mga lumalabag sa batas-trapiko.
Patuloy ang imbestigasyon ng mga awtoridad upang matukoy ang lawak ng operasyon at iba pang posibleng sangkot sa naturang gawain.
