Pansamantalang ipinasara ang nasa 35 na gasolinahan sa iba’t ibang bahagi ng Bicol Region matapos matuklasan ng Police Regional Office ang mga isyu sa operasyon nito, kabilang ang kawalan ng kaukulang business permits at pagkaubos ng supply ng petrolyo.
Batay sa pinakabagong datos hanggang nitong Miyerkules, Marso 31, ang mga naturang istasyon ay bahagi ng 835 na monitored na gasolinahan sa buong rehiyon na mahigpit na binabantayan ng mga awtoridad.
Ayon kay Brig. Gen. Erosito Miranda, ang pinuno ng Bicol police, naitala sa lalawigan ng Camarines Sur ang pinakamataas na bilang ng mga isinarang istasyon na umabot sa 16.
Apektado rito ang mga bayan ng Calabanga, Cabusao, Minalabac, Ocampo, Pili, Caramoan, San Jose, Siruma, at Iriga City.
Sinundan ito ng lalawigan ng Albay na may walong saradong gasolinahan sa Guinobatan, Polangui, Malinao, Daraga, Pio Duran, Malilipot, at Ligao City. Anim naman ang naitala sa Masbate, partikular sa Uson, Aroroy, Baleno, Batuan, Esperanza, at Palanas. Tig-dalawang istasyon ang pansamantalang natigil ang operasyon sa Camarines Norte at Sorsogon, habang isa sa Naga City.
Ipinaliwanag ng opisyal ang iba’t ibang dahilan ng pagpapasara, kabilang na ang ilang mga istasyon na kasalukuyang sumasailalim sa renovations.
Bilang hakbang upang maprotektahan ang publiko, tiniyak ng kapulisan na tuloy-tuloy ang kanilang isinasagawang pagbabantay sa presyo ng langis.
Layunin nitong masiguro na sumusunod ang lahat ng gasolinahan sa mga umiiral na regulasyon at maiwasan ang pananamantala sa mga konsyumer sa gitna ng sitwasyon.
