Iginiit ni Vice President Sara Duterte noong Biyernes, Hunyo 12, na wala siyang balak agawin ang posisyon ni Pangulong Ferdinand Marcos Jr. at nananatili siyang nakatuon sa kanyang sinumpaang tungkulin sa ilalim ng Konstitusyon.
Sa pakikipag-usap sa mga mamamahayag sa Davao City matapos ang isang aktibidad para sa Araw ng Kalayaan, tinanggihan ni Duterte ang mga panawagan mula sa ilang grupo at mga retiradong opisyal ng militar na manguna siya sa isang kilusang kahalintulad ng People Power laban sa kasalukuyang administrasyon.
Binigyang-diin ng Pangalawang Pangulo na anumang pagbabago sa liderato ng bansa ay dapat dumaan sa mga legal at konstitusyonal na proseso.
“Ako, I am the constitutional successor, I am the next in line ayon sa ating Constitution,” ani Duterte. “At mayroon akong sinumpaan noong ako ay nag-assume ng office of the Vice President at nakalagay doon that I will preserve and defend the Constitution.”
“So, wala sa aking mga kamay ang pagsasagawa ng extra-constitutional means to overthrow the current administration at hindi ko rin gusto ’yon,” dagdag pa niya.
Itinanggi rin ng Bise Presidente ang mga pahayag na nais niyang maagaw ang kapangyarihan mula kay Pangulong Marcos bago matapos ang kanyang termino.
“Hindi ko gusto agawin ’yung posisyon ni Bongbong Marcos,” aniya. “Gusto ko makita ng taumbayan hanggang sa dulo kung gaano ka walang-hiya si BBM.”
Ayon sa mga ulat mula Abril 2026, may ilang grupo umano na binubuo ng mga dating opisyal ng militar na hinihikayat ang suporta para sa posibleng aksyong pampulitika laban sa administrasyon, bagay na patuloy na pinaiimbestigahan at binabantayan.
Samantala, nananatiling inaasahan ang pagtakbo ni Duterte sa halalan sa 2028.
