Nag-anunsiyo ang National Grid Corporation of the Philippines (NGCP) na ang Visayas grid ay isinailalim sa yellow alert mula alas-5 hanggang alas-7 ng gabi ngayong Miyerkules, Mayo 20, 2026.
Ayon sa NGCP, ang available capacity ay nasa 2,691 megawatts habang ang peak demand ay tinatayang 2,438 megawatts.
Ibig sabihin, kulang ang operating margin upang matugunan ang contingency requirement ng transmission grid.
Ipinaliwanag ng NGCP na ilang power plants sa Visayas ang nasa forced outage, kabilang ang malalaking coal plants na TVI 1, TVI 2, at PEDC 3, na nagdulot ng malaking kakulangan sa suplay.
Bukod dito, 13 planta ang tumatakbo sa derated capacities na nagresulta sa 852.1 megawatts na hindi magagamit para sa grid.
Ang mataas na inaasahang demand sa sistema ay isa ring dahilan kung bakit inilagay sa yellow alert ang Visayas grid.
Ang yellow alert ay karaniwang inilalabas kapag hindi sapat ang reserbang kuryente upang matugunan ang pangangailangan sa oras ng biglaang aberya.
Bagama’t hindi pa nangangahulugang magkakaroon ng rotating brownouts, pinapayuhan ng NGCP ang publiko na maging handa sa posibleng epekto ng kakulangan sa suplay ng kuryente.
