Mariing pinabulaanan ng Maharlika Investment Corporation (MIC) ang mga ulat na nagsasabing may isang taong sangkot sa pandaraya na naglilingkod bilang tagapayo ng ahensya.
Sa isang opisyal na pahayag, sinabi ng MIC na walang katotohanan at nakakasira ang mga paratang na ito.
Ang pahayag ng MIC ay kasunod ng isang ulat na inilathala ng SarawakReport.org at iba pang media outlet na naglalaman ng maling impormasyon.
Binigyang-diin ng MIC na si Patrick Mahony—na sinasabing may kaugnayan sa kontrobersyal na One Malaysia Development Berhad (1MDB)—ay walang kaugnayan at hindi kailanman naging bahagi ng korporasyon.
Idinagdag pa ng korporasyon na mahigpit itong sumusunod sa batas at nasa ilalim ng pangangasiwa ng Board of Directors at ng management team nito.
Ayon pa sa ahensya, humiling na ito ng agarang pagtutuwid o pag-alis ng mga maling ulat upang maiwasan ang pagkalat ng mapanlinlang na impormasyon tungkol sa Philippine Sovereign Fund.
