Ibinahagi ni Chief Presidential Legal Counsel Salvador Panelo ang ideya na posibleng magtambal ang mag-ama na sina Davao City Mayor Sara Duterte at Pangulong Rodrigo Duterte sa 2022 Presidential elections.
Sa isinagawang dinner-fellowship noong nakaraang gabi na dinaluhan ng mga prominenteng political leaders sa Pangasinan, sinabi ni Panelo na walang legal impediment ang nasabing Duterte-Duterte tandem.
Maaari pa rin daw kasing tumakbo bilang bise-presidente si Pangulong Duterte sa oras na mag-expire na ang kaniyang termino sa 2022.
Ani Panelo, “The issue here is the continuity of the Duterte leadership.”
Pinatunayan umano ng Presidente ang kanilang matatag na political will upang ipatupad ang economic reforms at malinis na gobyerno sa Pilipinas, tulad ng kampanya laban sa iligal na droga, korapsyon, krimen, pag-aalsa at kahirapan.
Ito raw ang dahilan kung bakit hanggang ngayon ay mataas ang nakukuhang approval at trust ratings ng Duterte administration.
Kumpyansa din si Panelo na ang daughter-father tandem ay malugod na tatanggapin ng publiko.
Hindi na raw kasi bago ang ganitong senaryo sa pulitika ng Pilipinas. Ginawa pang halimbawa ni Panelo ang si dating Pangulong Gloria Macapagal-Arroyo na anak ng dati ring presidente ng Pilipinas na si Diosdad Macapagal. Gayundin si Benigno “Noynoy” Aquino III na anak naman ni Corazon Aquino.
Ilan sa mga lider ng Pangasinan na nagpahayag ng kanilang suporta para sa Duterte-Duterte tandem sa 2022 ay sina Presidential Adviser for Northern Luzon Secretary Raul L. Lambino, 5th District Rep. Ramon ‘Mon-Mon’ Guico III, Abono Partylist Rep. Conrad Estrella III, Vice Governor Mark Lambino, Board Members Von Mark Mendoza (2nd District), Vici Ventanilla (3rd District), Louie Sison (5th District), former Rep. and Alaminos City Mayor Arthur Celeste, Mayors Roldan Sagles (Aguilar), Anthony Penulliar (Mapandan), Joel delos Santos (Sta. Barbara), Martin Raul Sison II (Urbiztondo), Noel Geslani (Malasiqui), Rosita Rafael (Natividad), Julio ‘Rammy’ Parayno (Urdaneta City), Sangguniang Bayan Members ng Bayambang at iba pang civic leaders.
