Patuloy na nakaaapekto ang easterlies sa silangang bahagi ng Northern at Central Luzon ngayong araw, na nagdudulot ng mainit at maalinsangang panahon sa ilang lugar.
Inaasahan ang bahagyang pag-ulan sa hapon o gabi, partikular sa mga probinsyang nakaharap sa Dagat Pasipiko.
Samantala, isang napakalakas na bagyo ang kasalukuyang nasa labas pa ng Philippine Area of Responsibility (PAR).
Ang Super Typhoon Bavi, na may international designation na 2609, ay matatagpuan sa layong 2,010 kilometro silangan ng Gitnang Luzon.
Taglay nito ang pinakamalakas na hanging umaabot sa 195 kilometro kada oras malapit sa gitna, at bugso na umaabot hanggang 240 kilometro kada oras.
Kumikilos ito sa direksyong kanluran-hilagang kanluran sa bilis na 30 kilometro kada oras.
Bagama’t wala pang direktang epekto sa bansa ang Super Typhoon Bavi, patuloy na binabantayan ang galaw nito upang matiyak kung may posibilidad itong pumasok sa PAR sa mga susunod na araw.
Pinapayuhan ang publiko na manatiling nakatutok sa mga abiso at maging handa sa anumang posibleng pagbabago ng lagay ng panahon.
