Kinumpirma ng Bureau of Fisheries and Aquatic Resources (BFAR), bumaba ng pitong porsyento ang produksyon ng pangisdaan sa West Philippine Sea sa pagitan ng 2021 at 2022 sa kabila ng pagiging isa sa pinakamayamang lugar ng pangingisda sa kapuluan.
Sinabi ni BFAR spokesman Nazario Briguera na batay sa datos ng Philippine Statistics Authority (PSA), bumaba ang produksyon sa 275,872 metric tons ng isda noong 2022, mula sa 295,332 MT noong nakaraang taon.
Ngunit mabilis na nilinaw ng opisyal ng BFAR na ang pagbaba ng produksyon ay maaaring maiugnay sa mga bagyong humadlang sa paglayag ng mga mangingisda noong 2022 at hindi sa maritime territorial conflict sa lugar.
Gayunpaman, ang pagkakaiba ng 19,460 MT ay makabuluhan, kung isasaalang-alang na ang output mula sa West Philippine Sea ay kumakatawan sa 6.36 porsiyento ng kabuuang produksyon ng pangisdaan ng bansa noong 2022.
Ang produksyon ng pangisdaan mula sa bahaging ito ay sumasaklaw sa mga municipal at commercial sector ng pangisdaan ng Region 1, 3, 4-A ,4-B at ng National Capital Region.
Ang datos mula sa BFAR ay nagpapahiwatig din na noong nakaraang Enero 23, mayroong hindi bababa sa 373,733na mga mangingisda ang umaasa sa West Philippine Sea para sa kanilang kabuhayan.
