Pinangunahan ni Pangulong Ferdinand Marcos Jr. ang kauna-unahang Battalion Commander’s Symposium for External Security Operations na dinaluhan ng 161 battalion commanders mula sa Intelligence Service of the Armed Forces of the Philippines (ISAFP) at Philippine Army.
Layon ng naturang symposium na pagtibayin ang koordinasyon at interoperability ng mga yunit sa gitna ng lumalawak na hamon sa external security, kabilang ang pagprotekta sa teritoryo, pagpapalakas ng intelligence operations, at pagtiyak ng kahandaan ng mga ground unit sa posibleng banta mula sa labas ng bansa.
Sa kanyang talumpati, binigyang-diin ng Pangulo ang mahalagang papel ng mga battalion commander sa pagpapatibay ng pambansang seguridad.
Hinikayat niya ang mas malalim na pakikipag-ugnayan sa mga lokal na komunidad upang mabilis na matukoy ang mga posibleng banta at mapalakas ang tiwala sa pagitan ng militar at mamamayan.
Ayon kay Pangulong Marcos, mahalaga ang aktibong presensya ng mga yunit ng Army at ISAFP sa mga lalawigan upang mapanatili ang katatagan at kaayusan, lalo na sa mga lugar na may kritikal na posisyon sa seguridad at ekonomiya ng bansa.
Dagdag pa ng Pangulo, patuloy na susuportahan ng administrasyon ang modernisasyon ng AFP upang magkaroon ng mas maaasahang kagamitan, mas malawak na surveillance capability, at mas mabilis na pagresponde sa anumang banta sa teritoryo ng Pilipinas.
Inaasahang magiging regular na mekanismo ang nasabing symposium upang mapahusay ang pagpapatupad ng mga estratehiya at polisiya sa external security operations.
