Hinimok ni Pangulong Ferdinand Marcos Jr. ang Armed Forces of the Philippines (AFP) na manatiling nagkakaisa at tapat sa kanilang misyon na protektahan ang bansa sa kabila ng mga pagtatangka sa pagpapakalat ng maling impormasyon.
Ginawa ng Pangulo ang panawagan sa idinaos na tradisyunal na salu-salo kasama ang mga miyembro ng AFP Council of Sergeants Major sa Palasyo Malacañang sa Maynila.
Hinikayat ng Pangulo ang mga ito na huwag magpapadala sa ingay ng kasinungalingan sa gitna ng pagpapakalat ng maling impormasyon para sa kanilang pagkakawatak-watak, sa halip ay tumindig ang mga ito sa katotohanan.
Pinasalamatan din ng Pangulo ang AFP personnel para sa kanilang taus-pusong pagseserbisyo sa mamamayang Pilipino, sa kabila pa ng mga pagtatangkang subukin ang pagkakaisa sa pagitan ng kasalukuyang administrasyon at mga tropa ng gobyerno.
Kumpiyansa naman ang Pangulo na hindi magpapaguyo ang militar at mananatiling kaisa ng kaniyang administrasyon sa pagdepensa sa bansa.
Samantala, tiniyak naman ni AFP Sergeant Major, FCMS Feliciano Lazo sa Pangulo, na mananatili silang apolitical at fully committed sa kanilang pangako sa watawat ng Pilipinas, sa konstitusyon, sa Pangulo bilang kanilang duly elected commander in chief at sa pagsisilbi sa mamamayang Pilipino.
