BAGUIO CITY – Nagkaisa ang mga biktima ng Baguio City-based Satarah Wellness Marketing sa naging reaksiyon nila sa balitang ipinag-utos na ng Court of Appeals ang pag-freeze sa mga bank accounts at properties ng nasabing ponzi investment firm dahil sa diumano’y money laundering.
Ayon sa mga naging biktima nito, hanggang ngayon ay hinahangad pa rin nilang maibalik ang kanilang mga pera.
Iginiit nila na ang perang kanilang ipinuhunan sa kompanya ay kanilang pinagpaguran kung saan dahil na rin dito ay maraming nabaon sa utang.
Sinabi rin ng ilan na kung puwede ay huwag i-freeze ng korte ang mga bank accounts ng Satarah at sa halip ay ilipat na lamang ang pera sa mga biktima ng kompanya dahil may mga resibo naman silang maipapakita.
Saklaw ng freeze order ang bank accounts ng 31 katao na pinapangunahan ni Romyllie Batolne Lau na sinasabing incorporator ng kompanya na una na ring inaresto ng mga intelligence agents ng National Bureau of Investigation-Cordillera noong 2016 dahil sa kasong syndicated estafa.
Saklaw pa ng freeze order ang mga properties ng Satarah sa Baguio City at sa Lingayen, Pangasinan, maliban pa sa 11 sports utility vehicle at vans.
Nagparehistro ang Satarah Wellness noong 2013 bilang isang sole proprietorship na konektado sa pyramiding.
Ayon sa mga complainants, ipinangako ng Satarah ang 22% return of investment (ROI) pagkatapos ng tatlong buwan, 5% ROI pagkatapos ng 60 days, at referral fees na aabot sa 12% mula sa membership fee na P100,000 na para sa wellness goods nito.
Ipinalabas ng Securities and Exchange Commission ang cease and desist order laban sa Satarah noong June 2015.
Umaabot sa P1 billion ang sinasabing nalikom ng Satarah mula sa mga naging biktima nila, kasama na ang P150 million mula sa isang rural bank sa Mountain Province.
