Inihayag ng State Weather Bureau ang PAGASA na magdadala ng pag-ulan sa ilang bahagi ng bansa ngayong Linggo ang Northeast Monsoon (Amihan) at ang trough o extension ng isang low pressure area (LPA).
Ayon sa PAGASA ang SOCCSKSARGEN ay magkakaroon ng maulap na papawirin na may kalat-kalat na pag-ulan at pagkidlat-pagkulog dahil sa labangan ng LPA.
Habang ang katamtaman hanggang sa kung minsan ay malakas na pag-ulan ay maaaring humantong sa mga pagbaha o pagguho ng lupa.
Makakaranas din ang Ilocos Region, Cordillera Administrative Region, at Cagayan Valley ng bahagyang maulap hanggang sa maulap na papawirin na may pulu-pulong mahinang pag-ulan dahil sa Northeast Monsoon na nakakaapekto sa Northern Luzon.
Samantala, ang Metro Manila at ang nalalabing bahagi ng bansa ay magkakaroon ng bahagyang maulap hanggang sa maulap na papawirin na may pulu-pulong mga pag-ulan o pagkidlat-pagkulog dulot ng mga localized thunderstorms.
Sa panahon ng matinding bagyo, posibleng magkaroon ng flash flood o landslide.
Magiging maalon ang tubig sa baybayin sa silangang bahagi ng Visayas at Mindanao, at katamtaman hanggang maalon sa ibang bahagi ng bansa.
Ang pagsikat ng araw ay alas-6:25 ng umaga habang ang paglubog ng araw ay alas-5:49 ng hapon.
