Tinatayang aabot sa 20,000 katao ang dadagsa sa mga pangunahing kalsada ng Iloilo City ngayong hapon, kasabay ng ikalawang yugto ng malawakang kilos-protesta laban sa korapsyon.
Mas mataas ito kumpara sa 15,000 katao na dumalo sa rally sa Iloilo Provincial Capitol dalawang buwan na ang nakalipas.
Ayon sa Iloilo City Police Office (ICPO), handa na ang kanilang hanay upang tiyakin ang seguridad sa mobilisasyong inorganisa ng Kahublagan Kontra Korapsyon (KKK).
Kabuuang 200 personnel ng ICPO ang itinalaga sa mahahalagang lugar gaya ng Jaro Plaza, Iznart Street, at Iloilo Provincial Capitol grounds.
Dumating na rin ang karagdagang puwersa, kung saan 50 operatiba mula sa Regional Mobile Force Battalion 6 ang ipinadala upang palakasin ang seguridad ng lungsod.
Sa panayam ng Bombo Radyo kay Msgr. Meliton Oso, direktor ng Jaro Archdiocesan Social Action Center, sinabi niyang kabilang ang Archdiocese of Jaro sa 86 na simbahan na nagkakaisa sa panawagang panagutin ang lahat ng sangkot sa katiwalian.
Sa Iloilo, naglabas ng circular letter si Jaro Archbishop Most Reverend Midyphil B. Billones na nananawagan sa mga mananampalataya na makiisa sa isasagawang Kahublagan Kontra Korapsyon.
Sa kanyang liham, hinimok ni Archbishop Billones ang mga parokya, religious communities, mga propesyunal, business groups, kabataan, at civic organizations na magkaisa sa panawagang wakasan ang korapsyon.
