Umapela ang Malacañang sa publiko na maging mahinahon habang nagpapatuloy ang imbestigasyon at paghahain ng kaso laban sa mga sangkot sa anomalya sa mga flood control project.
Ayon kay Palace Press Officer Usec. Claire Castro, kailangan sundin ang due process dahil may mga kaso pang hinihintay ang kompletong ebidensya.
Ipinaliwanag niya na ang mga nasampahan na ng kaso ay yaong nakitaan ng sapat na basehan ng Office of the Ombudsman, kaya nairekomendang ihabla sa Sandiganbayan, na siya namang naglalabas ng warrant of arrest.
Dagdag ni Castro, may mga nakabinbing preliminary investigation pa sa Ombudsman at Department of Justice, at dapat maunawaan ng publiko na hindi “nadadaan sa isang tulugan” ang pagbusisi sa mga kaso.
Binigyang-diin ng Palasyo na marami nang nagawa sa loob ng halos apat na buwan mula nang mabunyag ang anomalya.
