Isinusulong ni Senator Erwin Tulfo ang isang panukala na naglalayong gawing libre ang mga pangunahing professional licensure examinations para sa mga kwalipikadong mahihirap na Pilipino, bilang bahagi ng hakbang upang mapalawak ang access sa propesyonal na trabaho at mabawasan ang underemployment.
Sa ilalim ng Senate Bill No. 2035 o ang “Free Professional Examinations Act,” hindi na sisingilin ng examination fees ang mga kwalipikadong indigent examinees para sa mga board, civil service, at bar examinations, alinsunod sa mga alituntunin ng mga kaukulang ahensya.
Ayon kay Tulfo, maraming Pilipino ang nakakapagtapos ng pag-aaral ngunit hindi naipagpapatuloy ang pagkuha ng lisensya dahil sa kakulangan ng pambayad ng examination fees, kaya napipilitang pumasok agad sa trabaho kahit hindi pa naaabot ang propesyonal na kwalipikasyon.
“Maraming kababayan natin ang nakakapagtapos pero hindi na nakakapag-exam dahil sa gastos. Sa halip na makuha ang lisensya, napipilitan silang magtrabaho agad—kadalasan sa mas mababang antas ng trabaho,” ani Tulfo.
Giit ng senador, nagreresulta ito sa pagkawala ng oportunidad ng mga mahihirap na Pilipino na umangat sa buhay, at naglilimita rin sa bilang ng mga bagong licensed professionals sa bansa.
Saklaw ng panukala ang Professional Regulation Commission (PRC) Board Examinations, Civil Service Commission (CSC) Eligibility Examinations, at Bar Examinations na pinangangasiwaan ng Korte Suprema.
Sa ilalim ng panukala, ang isang “qualified indigent” ay tutukuyin ng Department of Social Welfare and Development (DSWD), na siyang mag-iisyu ng sertipikasyon na ipiprisinta sa PRC, CSC, o Korte Suprema bilang batayan ng exemption.
Upang maiwasan ang abuso sa benepisyo, nililimitahan ang paggamit nito sa isang beses kada taon lamang para sa bawat aplikante.
“Hindi dapat nagiging hadlang ang kahirapan para sa mga gustong maging abogado, guro, nurse, o civil servant. Kung nakapagtapos sila, dapat may pagkakataon silang pumasa at magtagumpay,” dagdag ng senador.
