CAGAYAN DE ORO CITY-Nasabat ng mga pulis ang isang Jail officer matapos magdala ng malaking bulto ng pinaniniwalaang shabu sa checkpoint sa Brgy Tampilong Marawi City, Lanao del Sur.
Kinilala ang suspek na si Walid Nasser Usman, 32-anyos, may asawa at residente ng Brgy Adapun ali, Balo-i, Lanao del Norte.
Sinabi ni Police Regional Office (PRO) 10 spokesperson Lt. Col. Mardy Hortillosa na galing Iligan City sakay ng motorsiklo patungo Marawi City si Usman dala ang malaking halaga ng droga kayat ikinasa ang checkpoint sa Brgy Tampilong.
Nakuha sa posisyon ng suspek ang nasa 200 gramo ng pinaniniwalaang shabu na tinatayang nagkakahalaga ng P1,360,000.
Inihanda na ang kasong paglabag sa RA 9165 o Comprehensive Dangerous Drugs Act of 2002 na isasampa laban sa nahuling jail officer ng Lanao del Sur Provincial Jail.
