Ibinasura ng International Criminal Court (ICC) Appeals Chamber sa pamamagitan ng “unanimous” decision ang hiling na interim release o pansamantalang paglaya ni dating Pangulong Rodrigo Duterte nitong Biyernes, Nobiyembre 28.
Binasa ni ICC Appeals Chamber Presiding Judge Luz del Carmen Ibáñez Carranza ang naturang desisyon kung saan hindi pinagbigyan ang tatlong naging batayan sa apela ng kampo ng dating Pangulo.
Sa apela ng depensa, ikinatwiran nilang nagkamali umano ang Pre-Trial Chamber I sa paghusga na may flight risk o magdudulot ng panganib si Duterte sa mga testigo, gayundin sa pagtanggi sa state guarantee, at sa hindi pagsasaalang-alang sa humanitarian consideration.
Subalit, nitong Biyernes, pinagtibay ng Appeals Chamber ang naging desisyon ng Pre-Trial Chamber I na nauna ng tinanggihan ang apela ng dating Pangulo para sa interim release, matapos matukoy ang pangangailangan na manatili sa pagkakadetine ang dating Pangulo.
Una rito, nag-waive ang dating Pangulo ng kaniyang karapatan na maging present sa pagbasa ng hatol sa kaniyang interim release request at inatasan ang kaniyang mga abogado na kumatawan sa kaniya at dinggin ang desisyon ng Appeals Chamber.
Sa ngayon, nananatili nakadetine si dating Pangulong Duterte sa detention facility ng ICC sa The Hague, Netherlands. | via Bombo Everly Rico
