Hinikayat ng International Criminal Court (ICC) ang lahat ng mga bansa at kani-kanilang mga korte na suportahan ang pagpapatupad at pagpapairal sa international law sa buong mundo.
Ginawa ni ICC President Judge Tomoko Akane ang apela kasabay ng selebrasyon ng pagkakabuo ng Rome Statute, 28 taon na ang nakakalipas, sa pagtutulungan ng mga bansa sa buong mundo.
Ayon kay Akane, ang ICC ang tanging permanent court na may kapangyarihang tuldukan ang ‘impunity’ o kawalan ng pananagutan, at habulin ang mga makapangyarihang lider na gumagawa ng mga karumal-dumal na krimen.
Mula noong maitatag ang international tribunal aniya, nagawa na ng korte na tugunan ang mandato nito at patuloy nitong gagampanan ang misyon nito.
Naninidigan ang tribunal na hindi magkakaroon ng maayos na pagpapatupad ng international law kung walang independent judicial institution tulad ng ICC na walang-takot na magbigay o magpatupad ng batas para sa pag-iral ng hustisiya.
Ayon pa kay Judge Akane, ang patuloy na pag-iral ng ICC ay isang mahalagang pananggalang upang masigurong hindi nakakaligtas ang lider ng mga bansa o mga makapangyarihang indibidwal mula sa kanilang pananagutan, kapag nakagawa ng krimen tulad ng crimes against humanity.
Dahil dito, mahalaga aniyang mapanatili ang pagigiging independent ng tribunal at malaya sa anUmang impluwensiyang politikal.
Ang tribunal, ayon kay Akane, ay nagsisilbing tanglaw na nagbibigay ng pag-asa sa mga biktima ng krimen sa iba’t-ibang bahagi ng mundo.
Maaalalang bago nito ay nagpahayag si US Pres. Donald Trump ng pagnanais na mabuwag na ang ICC at hinimok ang mga bansa na tumiwalag na sa naturang tribunal.
Ayon kay Judge Tomoko Akane, hindi lingid sa kaalaman ng ICC ang mga pag-atake laban dito sa mga nakalipas na araw.
Batid aniya ng korte ang pressure, kapwa mula sa mga pag-atake at sa umano’y bumababang commitment ng mga bansa na panatilihin at ipatupad ang international law.
Bagaman malaking hamon ito aniya, mananatiling matatag ang ICC para tugunan ang naturang problema.
