Inihayag ni Pangulong Ferdinand Marcos Jr. na ang alegasyong nakatanggap ng pondo mula sa China ang isang kompanyang nauugnay kay Vice President Sara Duterte ay maaaring magdulot ng pambansang banta sa seguridad sa pinakamataas na antas kung mapapatunayang totoo.
Sa gitna ng impeachment trial laban sa bise presidente, kinumpirma ng Anti-Money Laundering Council (AMLC) na ang isang kompanyang may kaugnayan sa kaniya at sa kaniyang asawa ay nakatanggap ng P319 milyon mula sa Tsina at Hong Kong.
Binigyang-diin ng Pangulo na ang pondo mula sa Tsina ang pinakanakababahalang bahagi ng isyu dahil maaari itong maging usapin ng pambansang seguridad.
Gayunpaman, umaasa si Marcos na mapapabulaanan at mapapatunayang walang katotohanan ang mga naturang paratang laban sa Bise Presidente.
Samantala, nitong Lunes ay mariing itinanggi ni Atty. Salvador Paolo Panelo, ang tagapagsalita ni Duterte, ang mga alegasyon at sinabing walang anumang basehan ang mga pahayag na may kaugnayan ang bise presidente sa Tsina dahil lamang sa umano’y pagtanggap ng pondo.
