Sa pagtitipon ng Association of Southeast Asian Nations (ASEAN) Ministers on Energy Meeting, binigyang-diin ni Department of Energy (DOE) Secretary Sharon Garin na humaharap ang buong mundo sa huling bahagi ng isang napakahalagang panahon para sa sektor ng enerhiya, kung saan labis na sinusubok ang mga sistema ng enerhiya sa iba’t ibang bansa.
Ayon sa kalihim, ang mga geopolitikal na tensyon at ang patuloy na balakid sa daloy ng enerhiya sa buong mundo ay direktang nakakaapekto sa presyo ng langis, mga ruta ng suplay, at mga desisyong kailangang buuin ng bawat pamahalaan.
Ipinakita ng mga krisis na ito na nakatali pa rin ang ekonomiya ng bansa sa mga nangyayari sa buong mundo. Anumang aberya sa supply ng langis sa ibang bansa ay agad na nararamdaman sa ating mga industriya, sa singil sa kuryente, at sa badyet ng bawat pamilyang Pilipino.
Gayunpaman, ipinahayag ni Garin na naipakita rin ngayong taon ang matibay na kakayahan ng Timog-Silangang Asya na humarap sa krisis at pamahalaan ang sarili nitong sektor ng enerhiya.
Iginiit ng kalihim na bagama’t magkakaiba ang kakayahan ng bawat kasaping bansa sa Association of Southeast Asian Nations (ASEAN), maaari itong magdugtong-dugtong upang palakasin ang buong rehiyon at maging mas self-reliant kapag tumama ang mga pandaigdigang krisis sa enerhiya.
Sa pamamagitan aniya ng pagkakaisa, mas madaling uunlad ang rehiyon at may kasiguraduhan ang bawat bansa na may tutulong sa kanila kapag nagkakrisis.
Binigyang-diin ni Garin na ito ang mismong sentro ng pagtutulungan sa enerhiya ng Association of Southeast Asian Nations (ASEAN), partikular na para sa Pilipinas habang pinangungunahan ng bansa ang pagbuo ng mas matatag na hinaharap sa enerhiya ng rehiyon.
