DOLE nagpaalala sa mga employer ng tamang pasahod sa mga empleyadong papasok ngayong Pasko

Mahigpit na pinaalalahanan ng Department of Labor and Employment (DOLE) ang mga employer na sundin ang tamang pasahod sa kanilang empleyado na papasok ngayong Disyembre 25 o araw ng Pasko.

Sa inilabas na Labor Advisory 12 series of 2019 na ang mga empleyado na papasok ngayong araw ay dapat bayaran ng 200% ng kaniyang sahod sa loob ng walong oras.

Kapag lumagpas ng walong oras ay mababayaran ng karagdagang 30% ng kaniyang arawang sahod sa kada oras na igugugol nito sa trabaho.

Sakaling pumasok ito sa araw ng kaniyang day-off ay mababayaran ang isang empleyado ng 200% sa kaniyang arawang sahod at karagdagan 30% sa bawat oras na kaniyang ipinasok.