Kinalampag ng mga kawani ng Department of Health (DOH) ang Office of the Ombudsman upang imbestigahan ang umano’y nakakaalarmang BID-Rigging at iba pang gawaing katiwalian sa loob ng ahensya, kaugnay ng umano’y panghihimasok sa procurement process para sa 150 units ng Mobile Primary Care Facilities na nagkakahalaga ng ₱12 milyon bawat isa.
Sa reklamong inihain, humiling ang mga empleyado ng agarang pagsisiyasat laban kina Health Secretary Teodoro Herbosa, Head Executive Assistant Atty. Brigida Romualdez-Aquino, at Executive Assistant VI Allan Tope dahil umano sa pagmamanipula ng bidding, isang paglabag sa Anti-Graft and Corrupt Practices Act.
Ayon sa reklamo, ang tatlong opisyal ay hindi bahagi ng Bids and Awards Committee (BAC) at “walang awtoridad ngunit paulit-ulit na nakikialam” sa procurement para sa supply, delivery, testing, at commissioning ng naturang Mobile Primary Care Facilities.
Ipinunto rin ng nagrereklamo na tahasang pinapalitan umano ni Secretary Herbosa, sa pamamagitan ng kaniyang executive assistant na si Tope, ang Terms of Reference (TOR) at iginiit na sundin ang kanilang binuong bersyon.
Dagdag pa nila, hindi naman end-user ng mga bibilhing sasakyan ang tatlong opisyal kaya’t wala raw silang teknikal na batayan upang baguhin ang specifications na paglabag umano sa New Government Procurement Act.
Binigyang-diin ng mga kawani na ang End-User Unit lamang ang may kapangyarihang bumuo ng technical specifications, at ang BAC ang tanging may mandato upang sumuri nito. Ang umano’y panghihimasok ng tatlong opisyal ay indikasyon umano ng “undue influence” upang pumabor sa isang partikular na supplier.
Ayon pa sa reklamo, nagdulot na rin ng takot at pangamba sa rank-and-file employees ang umano’y panggigipit, kaya’t hiniling nila sa Ombudsman na ipataw ang preventive suspension kina Herbosa, Aquino, at Tope.
Iminungkahi rin nila ang pagsasagawa ng forensic examination at preservation ng procurement records kabilang ang TOR drafts, evaluations, email exchanges, at text messages upang maiwasan umano ang posibleng pag-delete o pagmamanipula ng ebidensya.
Giit pa ng mga complainant, nais nilang manatiling kumpidensyal ang kanilang pagkakakilanlan dahil sa pangamba na sila ay ma-retaliate o mapag-initan ng mga sangkot na opisyal.
Dagdag pa nila, sa kabila ng umano’y mga isyu at depekto sa mga naunang equipment na isinupply ng parehong contractor, ay ipinipilit pa rin umano ng ilang opisyal na sa nasabing supplier muli manggaling ang mga bagong unit.
Para sa kanila, malinaw itong indikasyon ng pagpabor sa isang supplier sa kabila ng umano’y kahina-hinang performance at kalidad ng mga nauna nitong deliveries.
