Hindi bloodbath kundi bubble bath ang tingin ng House prosecution panel sa Answer Ad Cautelam na isinumite ni Vice President Sara Duterte sa Senate impeachment court bilang tugon sa mga alegasyon sa kanya.
Ito ang inihayag ni House Impeachment Spokersperson Atty. Antonio Audie Bucoy.
Sinabi ni Bucoy na sa halip na harapin ang mabibigat na alegasyon, tila mas nakatutok ang kampo ni Duterte sa pagpigil sa tuluyang paglilitis.
Nuong Biyernes, inihain ng prosekusyon ang pormal na Reply sa Answer Ad Cautelam ni Duterte, na naglalaman umano ng “misconceptions, falsehood and general denial.”
Binigyang-diin ni Bucoy na bigong sagutin ng depensa ang mga tiyak na alegasyon ng katotohanan at sa halip ay nagbigay ng pangkalahatang pagtanggi na walang paliwanag.
“Hindi ho niya sinagot ‘yung mga factual allegations. Sinabi lang niya hindi totoo ’yan. Ang problema sa general denial, na hindi mo sinagot in particular ‘yung sakdal. Dapat kasi pag ide-deny mo, sasabihin mo kung bakit,” paliwanag pa niya.
Sa ilalim ng batas, ipinaliwanag ni Bucoy na ang ganitong uri ng pagtanggi na walang paliwanag ay maaaring ituring na pag-amin.
Kabilang sa seryosong alegasyong hindi tinutulan ng kampo ni Duterte ay ang umano’y maling paggasta ng P125 milyon sa confidential funds sa loob lamang ng 11 araw, na na-flag sa audit findings.
Dagdag niya, hindi rin sinagot ni Duterte ang paratang ng prosekusyon na tinangka niyang pigilan ang paglalabas ng mga dokumento ng Commission on Audit (CoA), kabilang na ang diumano’y pagpwersa sa CoA na huwag isapubliko ang ilang records.
Pinuna rin ni Bucoy ang kampo ni Duterte sa umano’y pagtatangkang ilihis ang usapin sa pamamagitan ng mga procedural objections, gaya ng forum-shopping at jurisdictional claims, sa halip na harapin ang mga aktwal na paratang.
Aniya, hindi dapat madistract ang Senado bilang Impeachment Court sa mga taktikang ito, at iginiit na ang tunay na usapin ay kung nararapat pa bang manatili si Duterte sa kanyang posisyon bilang opisyal ng gobyerno.
Sa kabila ng mga pampublikong pahayag ni Duterte na hinahamon ang mga nag-aakusa sa kanya na ituloy ang trial, sinabi ni Bucoy na iba ang ipinakikitang galaw ng kanyang legal team.
