CAGAYAN DE ORO CITY – Nahuli ng pulisya ang ‘person of interest’ sa panggagahasa at pagpatay sa isang dalaga na kapatid ng isang pulis sa may Poblacion Valencia City, Bukidnon Biyernes ng madaling araw.
Kinilala ni Valencia City Police director Lt. Col. Surki Serenias ang hinuli na si Angelito Barwado, 30-anyos habang ang biktima ay itinago lamang sa pangalang alyas Weng, 26-anyos at residente ng Barangay Tongan-tongan sa nasabing lungsod.
Sinabi ni Serenias na batay sa kanilang inisyal na imbestigasyon, pinasok ng suspek ang biktima habang natutulog ito sa kaniyang inuupahang kwarto.
Nanlaban umano ang biktima kaya sinaksak ito ng maraming beses ng suspek bago ginahasa.
Ayon kay Serenias, ginilitan pa ng suspek ang leeg ng biktima na naging sanhi ng kaniyang agarang pagkamatay.
Pinaniniwalaang nagawa ng suspek ang krimen matapos siyang binasted ng biktima at sinagot ang karibal nitong isang sundalo.
