Inilunsad ng Bureau of Internal Revenue (BIR) ang one-time Tax Abatement Program para sa mga micro taxpayers upang matulungan silang ayusin ang kanilang delinquent accounts at makapagsimula muli nang walang mabigat na pasanin.
Saklaw ng programa ang mga negosyong may taunang benta na hindi lalampas sa P3 milyon at may tax liabilities na hindi tataas sa P80,000.
Ang mga kwalipikadong aplikante ay maaaring mag-avail hanggang Disyembre 31, 2026.
Ayon kay Commissioner Charlito Martin R. Mendoza, layunin ng programa na suportahan ang direktiba ni Pangulong Ferdinand Marcos Jr. na gawing mas madali ang pagsunod sa buwis at gawing mas accessible ang serbisyo ng pamahalaan.
Dagdag pa ni Finance Secretary Frederick D. Go, bahagi ito ng Ease of Doing Business reforms upang tulungan ang maliliit na negosyo na makapagpatuloy nang maayos.
Ang mga aplikante ay kinakailangang magbayad ng P5,000 abatement fee at magsumite ng aplikasyon sa kanilang Revenue District Office.
Kapag nakumpleto ang requirements, bibigyan sila ng Certificate of Availment bilang patunay na sarado na ang kanilang kaso.
Sa pamamagitan nito, inaasahan ng BIR na mas maraming micro taxpayers ang magiging masunurin at makapagsisimula muli nang malinis ang record.
