Pinangunahan nina Bureau of Internal Revenue (BIR) Commissioner Charlito Martin R. Mendoza at Supreme Court Associate Justice Alfredo Benjamin S. Caguioa ang pagpupulong upang pag-isahin ang Electronic Documentary Stamp Tax (eDST) system ng BIR at ang Electronic Notarization (eNotarization) facility ng Korte Suprema.
Layunin ng inisyatiba na gawing digital ang buong proseso ng notarization mula simula hanggang dulo. Sa pamamagitan nito, maaari nang bayaran at ilakip nang electronic ang Documentary Stamp Tax (DST) nang hindi na kailangang bumalik sa tradisyunal na papel.
Ayon kay Commissioner Mendoza, ang hakbang ay bunga ng kanilang naging diskusyon noong Pebrero 2026, kung saan natukoy ang manwal na pagdidikit ng DST bilang natitirang “paper-based step” sa electronic notarization.
“Kung ang isang dokumento ay maaaring pirmahan, i-notaryo, at beripikahin sa paraang digital, hindi na dapat ito bumabalik pa sa papel para lamang sa Documentary Stamp Tax,” pahayag ni Mendoza.
Ang naturang reporma ay nakasalig sa mga sumusunod na panuntunan:
1. Supreme Court Rules on Electronic Notarization** (inaprubahan noong Pebrero 4, 2025)
2. BIR Revenue Regulations No. 28-2025** (ipinatupad noong Disyembre 22, 2025 na nag-aatas ng paggamit ng enhanced eDST sa mga sakop na taxpayer kabilang ang mga notary public)
Ayon pa sa BIR, ang pakikipagtulungang ito sa Korte Suprema ay alinsunod sa modernisasyon at digital transformation ng ahensya sa ilalim ng BIR DARES, gayundin sa pagsusulong ng pamahalaan sa Ease of Doing Business upang maging mas mabilis, simple, at ligtas ang mga transaksyon ng mga mamamayan at negosyo.
