Inilunsad ng Department of Finance (DOF) at Bureau of Internal Revenue (BIR) ang Taxpayer Portal para sa mga rehistradong nasa ilalim ng Large Taxpayers Service sa kanilang pambansang tanggapan sa Quezon City noong Mayo 26, 2026.
Layunin ng bagong plataporma na gawing mas madali at organisado ang pamamahala ng tax records at transaksyon ng mga malalaking negosyante.
Sa pamamagitan ng portal, maaaring makita ng mga taxpayer ang kanilang registration details, masubaybayan ang mga tax return, matunton ang mga bayad, at makatanggap ng paalala mula sa sistema.
Sa kanyang talumpati, binigyang-diin ni Finance Secretary Frederick D. Go na ang TP Portal ay mag-aalis ng kalituhan sa paggamit ng magkakahiwalay na sistema at magbibigay ng mas malinaw na pananaw sa tax records.
Pinuri rin niya ang pamunuan ng BIR sa pangunguna ni Commissioner Charlito Martin R. Mendoza sa pagtupad sa pangako ng reporma at digital transformation.
Ayon kay Commissioner Mendoza, ang TP Portal ay bahagi ng serye ng digital initiatives ng BIR ngayong 2026, kabilang ang Interactive Digital Tax Calendar, QR Code Verification System, at Digital TIN sa eGovPH App. Dagdag pa niya, ang pilot implementation ay nakatuon muna sa mga malalaking taxpayer upang mas mapahusay ang sistema bago ito palawakin.
Itinuring ng DOF at BIR ang paglulunsad bilang malaking hakbang tungo sa mas mabilis, mas transparent, at mas episyenteng pamahalaan.
Ang milestone na ito ay inaasahang magpapalakas ng kumpiyansa ng mga negosyante at mamumuhunan sa Pilipinas bilang isang matatag at handang ekonomiya.
