Patuloy na nananatiling malakas ang bagyong Inday habang ito ay kumikilos pa-kanlurang hilaga sa silangan ng Hilagang Luzon.
Tinatayang nasa 780 kilometro silangan ng Aparri, Cagayan ang sentro ng mata ng bagyo.
Taglay nito ang pinakamalakas na hanging umaabot sa 165 kilometro kada oras malapit sa gitna at bugso na hanggang 205 kilometro kada oras, habang kumikilos sa direksyong pa-kanlurang hilaga sa bilis na 20 kilometro kada oras.
Nakataas ang Signal No. 2 sa Batanes, silangang bahagi ng Babuyan Islands (Babuyan, Didicas, Camiguin), at hilagang-silangang bahagi ng mainland Cagayan (Santa Ana).
Samantala, nasa Signal No. 1 ang natitirang bahagi ng Cagayan kabilang ang Babuyan Islands, Isabela, hilagang-silangan ng Quirino (Maddela), Apayao, hilagang bahagi ng Abra, Kalinga, silangang bahagi ng Mountain Province, silangang bahagi ng Ifugao, Ilocos Norte, hilagang bahagi ng Aurora, at hilagang at gitnang bahagi ng Catanduanes.
Bagama’t walang direktang epekto sa Metro Manila, inaasahang magdadala ng malalakas na ulan at hangin ang bagyo sa mga lugar na nasa ilalim ng babala.
Pinapayuhan ang mga residente na maghanda laban sa posibleng pagbaha at pagguho ng lupa, at sumunod sa mga abiso ng lokal na pamahalaan.
