MANILA – Nilinaw ng Food and Drug Administration (FDA) na mas mabilis ang proseso ng approval sa mga test kit ng COVID-19 kumpara sa mga pinag-aaralang gamot at bakuna.
Pahayag ito ng ahensya sa gitna ng isinusulong na rin ngayon na “saliva testing” o paggamit ng laway bilang specimen para matukoy kung infected ng COVID-19 ang isang tao.
“Usually a few days lang sa mga test kit natin. So kung ma-file nila yung official today, I would think mga dalawa o tatlong araw lang made-desisyunan na yan ng ating Center for Medical Devices,” ani FDA director general Eric Domingo.
Ang reaksyon ng opisyal ay kasunod din ng inaasahang paglalabas ng Philippine Red Cross (PRC) ng resulta sa ginawa nilang “pilot study” sa saliva testing.
Ayon kay Domingo, wala pang ipinapasang aplikasyon ang PRC para sa kanilang saliva test kit. Pero may isang kompanya na raw na lumapit sa ahensya para ipa-rehistro ang alternatibong testing strategy.
“Yung isang company na naggawa ng RT-PCR test kit ay nag-apply na ng expansion, yung isama yung saliva.”
“Kahapon mayroon lamang sa kanilang application form na kailangan i-fill up, i-submit and it will be evaluated.”
Sinabi ng Department of Health na baka sa Miyerkules ipasa ng PRC ang resulta ng kanilang pilot study sa COVID-19 saliva test.
Bukod sa ahensya, susuriin din ng laboratory expert panel at Health Technology Assessment Council (HTAC) ang resulta ng pag-aaral ng Philippine Red Cross.
