Ligtas na nakabalik sa Pilipinas ang kabuuang 442 Pilipino mula sa United Arab Emirates.
Inilikas ang mga Pinoy workers mula sa naturang bansa gamit ang PHL government-chartered B747-400 flight, alinsunod sa direktiba ni Pangulong Ferdinand Marcos Jr.
Lulan ng nasabing chartered flight si Department of Migrant Workers (DMW) Secretary Hans Leo Cacdac at ang kabuuang daan-daang Pinoy workers, kung saan mahigit 200 sa kanila ay pawang mga overseas Filipino worker.
Lumapag ang Special Chartered Flight sa Ninoy Aquino International Airport (NAIA) Terminal 3 bandang alas-12:30 ng tanghali ngayong Marso 14.
Pinangungunahan ng DMW ang pagsalubong sa mga repatriate, katuwang ang Overseas Workers Welfare Administration (OWWA), Department of Social Welfare and Development (DSWD), Department of Health (DOH), Technical Education and Skills Development Authority (TESDA), at Bureau of Immigration (BI).
Una nang sinimulan ng pamahalaan ang malawakang repatriation sa Pinoy workers sa Middle East matapos pumutok ang kaguluhan doon, dala ng kaliwa’t kanang missile at drone strikes sa iba’t-ibang bahagi ng naturang rehiyon.
