Inihayag ng Philippine National Police (PNP) na ang five-man advisory group ay nagrekomenda sa 36 na matataas na opisyal ng pulisya para sa karagdagang pagsusuri ng National Police Commission (Napolcom).
Sa isang pahayag, sinabi ni PNP spokesperson Police Colonel Jean Fajardo na inalis ng advisory group ang natitirang 917 matataas na opisyal ng pulisya, na nagsumite rin ng kanilang courtesy resignation, mula sa anumang pagkakasangkot sa ilegal na droga.
Aniya, para sa natitirang 36, sasailalim sila sa karagdagang pagsusuri ng Napolcom.
Sinabi ni Fajardo na inihayag ni Interior and Local Government Secretary Benjamin Abalos Jr. na 917 sa 953 matataas na opisyal ng pulisya na nagsumite ng courtesy resignation ay na-clear na.
Ang pagpapalabas ng mga pangalan ng mga cleared third-level police officers ay depende sa desisyon ni Pangulong Ferdinand “Bongbong” Marcos Jr.
Kung matatandaan, noong Abril 20, natapos na ng five-man advisory group ang pagsusuri sa courtesy resignations ng 953 matataas na opisyal ng PNP.
