Nakapagtala ang Philippine Institute of Volcanology and Seismology (PHIVOLCS) ng 195 na lindol sa paligid ng Claveria, Masbate mula 9:22 ng umaga hanggang 3:00 ng hapon nitong Besperas ng Pasko.
Sa tala, 17 na lindol ang may lakas na magnitude 1.8 hanggang 3.1 at lalim na 3 hanggang 21 kilometro. Bagama’t marami ang naitala, wala sa mga ito ang naiulat na naramdaman ng mga residente.
Kinagabihan, isang magnitude 1.9 tectonic earthquake ang muling naitala bandang 11:08 ng gabi, ngunit hindi rin ito nagdulot ng pinsala o aftershocks.
Ayon sa PHIVOLCS, ang Masbate ay bahagi ng Philippine Fault Zone kaya’t natural ang madalas na seismic activity sa rehiyon.
Ang serye ng mahihinang lindol ay tinatawag na earthquake swarm, indikasyon ng patuloy na paggalaw ng fault system.
Patuloy na nagmo-monitor ang PHIVOLCS at pinaaalalahanan ang publiko na manatiling alerto at handa sa anumang posibleng mas malakas na pagyanig.
