Iginiit ng mga organizer ng “Trillion Peso March” na hindi tututok ang kilos-protesta ngayong araw sa pagkakabahagi ng politika sa bansa kundi sa pangunahing layunin nito — ang paglaban sa sistemikong korapsyon sa pamahalaan.
Ayon kay Kiko Aquino Dee, isa sa mga organizer at apo nina Cory at Ninoy Aquino, hindi sila pabor o laban sa anumang opisyal.
Giit ni Dee, ang pangunahing panawagan ng rally ay transparency, pagbabalik ng pera, pagrespeto sa 1987 Konstitusyon, at paglaban sa mga dinastiya.
Binanggit niya na sa ngayon, tanging mga kontratista at dating mga engineers ng Department of Public Works and Highways lamang ang naaresto at nakulong.
Dagdag niya, nais nilang makita ang pag-aresto sa mga matataas na opisyal na sangkot sa korapsyon upang ipakita sa publiko na walang ‘sacred cows’ sa imbestigasyon.
Nilinaw din ni Dee na ang mga magdadala ng placard na humihiling ng pagbibitiw kay Pangulong Marcos ay hindi pakikialaman basta’t hindi nakakaabala.
Subalit, ayon sa kanya, kung magtatangkang humikayat ng extra-constitutional actions, tulad ng pagtanggal ng suporta ng Sandatahang Lakas, ito ay labag sa patakaran.
