Iniulat ng Land Transportation Franchising and Regulatory Board (LTFRB) na nakatakda na sa huling bahagi ng buwan o unang bahagi ng Hulyo ang paglulunsad ng ikalawang yugto ng P5-bilyong fuel subsidy program para sa mga driver at operator ng public utility vehicle (PUV).
Sinabi ni LTFRB Executive Director Tina Cassion na inihahanda na ng ahensya ang mga dokumento para sa pamamahagi ng panibagong P6,500 fuel subsidy para sa bawat benepisyaryo ng PUV sector.
Dagdag pa nito na noong nakaraang linggo ay wala pang 5,000 sa 377,000 benepisyaryo ang hindi pa nakakatanggap ng unang tranche ng fuel subsidy.
Inilabas ng LTFRB ang listahan ng mga benepisyaryo na may credited fuel subsidy.
Nahahati sa dalawang magkapantay na tranches, ang P5-B fuel subsidy program ng gobyerno na naglalayon na palawigin ang P6,500 cash grants sa bawat isa sa 377,000 benepisyaryo, kabilang ang LTFRB-supervised PUV drivers and operators, tricycle drivers at operators sa ilalim ng Department of the Interior and Local Government , at mga delivery riders sa ilalim ng Department of Trade and Industry.
Ayon sa LTFRB, nagsilbing stopgap measure ang fuel subsidy program kapalit ng hinahangad na minimum fare hike sa gitna ng tumataas na presyo ng langis.
Ngunit, sinabi ni Cassion na nagpasya ang LTFRB na repasuhin ang naunang desisyon nito na tanggihan ang P1 provisional minimum jeepney fare hike petitions sa gitna ng patuloy na pagtaas ng presyo ng gasolina.
Magugunitang, sa unang bahagi ng linggong ito, inaprubahan ng ahensya ang P1 na provisional increase sa minimum fare ng mga jeepney sa Metro Manila, Region 3 at Region 4.
