Iginiit ni Bicol Saro Rep. Terry Ridon na hindi maaaring gamitin ng Land Transportation Office (LTO) ang Implementing Rules and Regulations (IRR) ng Electric Vehicle Industry Development Act (EVIDA) bilang batayan para simulan ang pag-impound ng e-bikes at e-trikes sa 1 Disyembre 2025.
Ayon kay Ridon, malinaw na nakasaad sa EVIDA law na exempted mula sa pagpaparehistro sa Department of Transportation at LTO ang light electric vehicles (LEVs), kabilang ang e-bikes at e-trikes. Dahil dito, hindi umano sila saklaw ng Republic Act 4136, kabilang ang mga penalidad nito tulad ng impounding.
Sinabi ni Ridon na ang EVIDA IRR ay “epektibong pinapaliit” ang saklaw ng exemption na ibinigay ng Kongreso sa pamamagitan ng pagdagdag ng mga kondisyon na hindi nakasaad sa batas.
Giit niya, hindi maaaring amyendahan o bawasan ng IRR ang anumang probisyon ng isang batas.
Binalaan ng kongresista na magiging “grave injustice” ang pagpapatuloy ng LTO sa planong impounding batay sa isang probisyong legalmente kuwestiyonable.
Aniya, lalabanan ito sa Kongreso at posible ring dalhin sa korte ng mga grupo mula sa LEV at alternative mobility sector.
Inanunsyo rin ni Ridon na magsusumite siya ng House Resolution sa Lunes upang hilingin sa Department of Transportation na ipatigil ang implementasyon ng impounding simula Disyembre 1, at isailalim sa pagsusuri ang impounding mandates ng LTO at iba pang ahensya tulad ng MMDA.
