Naglabas ng mahigpit na paalala ang Office of the Vice President (OVP) upang mag-ingat ang publiko laban sa mga kumakalat na kahina-hinalang mensahe na nagpapanggap na mula sa kanilang tanggapan.
Nilinaw ng OVP na iisa lamang ang kanilang kinikilalang opisyal na email address upang maiwasan ang anumang uri ng panlilinlang o misimpormasyon.
Ayon sa ahensya, ang mga lehitimong mensahe ay magmumula lamang sa vp@ovp.gov.ph.
Upang matiyak ang kaligtasan ng mga mamamayan laban sa mga posibleng panloloko, binalaan ng ahensya ang publiko na huwag pansinin ang mga transaksyon mula sa ibang mga account.
Hinimok din ng tanggapan ang mga nakatanggap ng mga kahina-hinalang mensahe na agad itong ipagbigay-alam sa mga kinauukulan.
Sa kasalukuyan, hindi na nagbigay ng karagdagang detalye o impormasyon ang OVP kung may mga partikular na insidente, sindikato, o indibidwal na nabiktima na ng nasabing mga pekeng komunikasyon.
