Bumuo na ng tracker team ang PNP para maaresto si dating P/Col. Eduardo Acierto na pina-aaresto ng korte.
Ayon kay PNP Chief P/Gen. Oscar Albayalde, natanggap na nila nitong Miyerkules ng gabi ang arrest warrant at kaagad na kumilos ang Criminal Investigation and Detection Group (CIDG) para dakpin si Acierto.
Tinatrabaho na rin aniya ng PNP-Firearms and Explosives (FEO) ang pagkansela sa lahat ng gun license ni Acierto.
Sinabi ni Albayalde na nakitaan ng sapat na ebidensiya si Acierto kaya sinampahan ito ng kaso ng drug smuggling.
Bukod kay Acierto, pinahuhuli rin ng korte sila dating Customs Intelligence Officer Jimmy Guban, dating PDEA Deputy Director for Administration Ismael Fajardo; importers na sila Chan Yee Wah, alias KC Chan; Zhou Quan, alias Zhang Quan; consignees na sina Vedastos Cabral Baraquel Jr. at Maria Lagrimas Catipan ng Vecaba Trading; at isang Emily Luquingan.
